21st September 2023

Have a Great Day
31st January 2023
@ TapOvanam, Hiremath, Tumkur

ಬೇಂದ್ರೆ ಎಂದರೆ ಬರೀ ಕವಿಯಲ್ಲ;

ಬೇಂದ್ರೆ ಎಂದರೆ ಕವನ,

ಅವರು ನಾಕುತಂತಿಗಳ ತನನನಾS...

ಕವಿಯ ಜನ್ಮದಿನದಂದು

ಅವರ ನಾಕುತಂತಿಗಳ

ನಾದಮಾಧುರ್ಯಕ್ಕೆ ಕಿವಿಯಾಗುತ್ತ....

ನಾಕು ತಂತಿ

ಒಂದು (1)

೧)

ಆವು ಈವಿನ

ನಾವು ನೀವಿಗೆ

ಆನು ತಾನದ

ತನನನಾS

(೨)

ನಾನು ನೀನಿನ

ಈ ನಿನಾನಿಗೆ

ಬೇನೆ ಏನೋ?

ಜಾಣಿ ನಾS

(೩)

ಚಾರು ತಂತ್ರಿಯ

ಚರಣ ಚರಣದ

ಘನಘನಿತ ಚತು-

-ರಸ್ವನಾ

(೪)

ಹತವೊ ಹಿತವೋ

ಆ ಅನಾಹತಾ

ಮಿತಿಮಿತಿಗೆ ಇತಿ

ನನನನಾ

(೫)

ಬೆನ್ನಿನಾನಿಕೆ

ಜನನ ಜಾನಿಕೆ

ಮನನವೇ ಸಹಿ-

ತಸ್ತನಾ.

ಎರಡು (2)

(೧)

ಗೋವಿನ ಕೊಡುಗೆಯ

ಹಡಗದ ಹುಡುಗಿ

ಬೆಡಗಿಲೆ ಬಂದಳು

ನಡುನಡುಗಿ;

(೨)

ಸಲಿಗೆಯ ಸುಲಿಗೆಯ

ಬಯಕೆಯ ಒಲುಮೆ

ಬಯಲಿನ ನೆಯ್ಗೆಯ

ಸಿರಿಯುಡುಗಿ;

(೩)

ನಾಡಿಯ ನಡಿಗೆಯ

ನಲುವಿನ ನಾಲಿಗೆ

ನೆನೆದಿರೆ ಸೋಲುವ

ಸೊಲ್ಲಿನಲಿ;

(೪)

ಮುಟ್ಟದ ಮಾಟದ

ಹುಟ್ಟದ ಹುಟ್ಟಿಗೆ

ಜೇನಿನ ಥಳಿಮಳಿ

ಸನಿಹ ಹನಿ;

(೫)

ಬೆಚ್ಚಿದ ವೆಚ್ಚವು

ಬಸರಿನ ಮೊಳಕೆ

ಬಚ್ಚಿದ್ದಾವುದೋ

ನಾ ತಿಳಿಯೆ.

(೬)

ಭೂತದ ಭಾವ

ಉದ್ಭವ ಜಾವ

ಮೊಲೆ ಊಡಿಸುವಳು

ಪ್ರತಿಭೆ ನವ.

ಮೂರು (3)

(೧)

’`ಚಿತ್ತೀಮಳಿ, ತತ್ತೀ ಹಾಕತಿತ್ತು

ಸ್ವಾತಿ ಮುತ್ತಿನೊಳಗ

ಸತ್ತಿSಯೊ ಮಗನS

ಅಂತ ಕೂಗಿದರು

ಸಾವೀ ಮಗಳು, ಭಾವೀ ಮಗಳು

ಕೂಡಿ’'

(೨)

’`ಈ ಜಗ, ಅಪ್ಪಾ, ಅಮ್ಮನ ಮಗ

ಅಮ್ಮನೊಳಗ ಅಪ್ಪನ ಮೊಗ

ಅಪ್ಪನ ಕತ್ತಿಗೆ ಅಮ್ಮನ ನೊಗ

ನಾ ಅವರ ಕಂದ

ಶ್ರೀ ಗುರುದತ್ತ ಅಂದ.’'

ನಾಕು (ನಾಲ್ಕು 4 )

``ನಾನು’' ``ನೀನು'', ``ಆನು'', ``ತಾನು'' ನಾಕೆ ನಾಕು ತಂತಿ,

ಸೊಲ್ಲಿಸಿದರು ನಿಲ್ಲಿಸಿದರು, ಓಂ ಓಂ ದಂತಿ!

ಗಣನಾಯಕ ಮೈ ಮಾಯಕ ಸೈ ಸಾಯಕ ಮಾಡಿ

ಗುರಿಯ ತುಂಬಿ ಕುರಿಯ ಕಣ್ಣು ಧಾತು ಮಾತು ಕೂಡಿ.

- ಅಂಬಿಕಾತನಯದತ್ತ (ದ.ರಾ.ಬೇಂದ್ರೆ)

ಕವಿಗೆ, ಕವಿತ್ವಕ್ಕೆ,

ಕವಿಯೊಳಗಿನ ದಾರ್ಶನಿಕನಿಗೆ

ನಮೋ ನಮಃ...

ಡಾ. ಶಿವಾನಂದ ಶಿವಾಚಾರ್ಯರು

ಹಿರೇಮಠ, ತಪೋವನ, ತುಮಕೂರು